-بعد كل الوقت ده مبكتبش وكابته في نفسي قررت اكتب واطلع اللي جوايا وادي البنات صوره واقعيه للجواز والخلفه ،طبعا امهات كتير اتكلموا عن العيال وحواراتهم واللي بيعمل فيديوهات تضحك وكده بس احنا نختلف عن الآخرين تماما مش عارفه في ايه بس أنا مش بكتب الكلام ده عشان يشوفه ناس كتير ولا عشان لايكات والجو ده أنا جايه ابعبع وامشي
اولا الجواز
بصي ياستي البنت اللي مخطوبه وخائفة من الجواز أحب أقولك ان الجواز قبل الخلفه لعب عيال زمبقولك كده توقعي كده ايه أقصي حاجه هتحصل؟ مش هتعرفي توضبي البيت؟ عنه ماتوضب خليه معفن أقصي حاجه انك هتربي عنكبوت ظريف يسليكي إنتي وجوزك ويملالك الأركان عشان متبقاش فاضيه كده ، او هتحرقي الاكل هتاكلوه برده وهو محروق اعتبريه صنف جديد ،من الاخر الجواز قبل الخلفه دلع
-تعالي بقه للجد حملتي؟ الف مبروك طبعا اول حمل ده ليه مذاق خاص دلع بقه واهتمام من كل اللي حواليكي وكل ما حد يعرف هتسمعي( الف مبروك ياحبيبتي خدي بالك من نفسك اوي وكلي كويس واوعيييييي تقولي لحد) وفي الاخر طبعا بتلاقي كل الناس عارفه وبيشتغلوكي إنتي بس
-الاهتمام حلو مفيش كلام ،جوزك هيقولك لا بلاش طبيخ متتعبيش نفسك، مامتك تعملك اكل وتبعتهولك ،حماتك كل شويه تطمن عليكي وطبعا نصائح عظيمه من كل الناس انك حامل ولازم تآكلي لاتنين وكلي صحي ومفيد اللي هو سمنه بلدي وألبان كامله الدسم في محاوله تحويلك الي جاموسه عشار تجيب عجل كل العيله تفرح بيه
-إحساسك بقه الكيوت اللي هيخليكي تبصي علي بطنك كل دقيقه ومستنياها تكبر والبيبي هيتحرك امتي بقه وأول حركه للبيبي لما تكون بطنك مزار سياحي لأي حد يحط أيده عليها عشان يحس بحركه البيبي الكيوت
-لحد بقه ماتوصلي للشهر السابع ويبدا التقل بس برده مقدور عليه عشان قدامك الفرصة الاخيرة للنوم براحتك من غير منغصات وافتكري أني قولت فرصه اخيره لحد ما يجي وقت الولاده ....تاتاتاتن
-غالبا الدكتور هيقولك ان عندك مشكله للأسف مابتحصلش كتير ولازم تولدي قيصري زي ماقال الكلام ده لكل الستات قبلك ويشق بطنك ويتعلم عليكي زي ماتعلم علي كل ستات الجيل
ويجي البيبي بالسلامه الف مبروك بس متفرحيش اوي ...تهنيات واحتفالات واجواء ظريفه لحد ماتروحي البيت مع هذا الكائن الجديد اللي إنتي مش عرفاه ولا فاهمه فيه حاجه
-بصي بقه اكتر حاجه مزعجه تخاريف اول بيبي كل حاجه ليها اسطوره زي مثلا: حبيبي عارفك !!حضرتك عارفها ازاي عيل عنده يومين مبيشوفش أصلا كل طموحه في الحياه يأكل وينام عرفها امتي ؟! اذا اديتيه لكلب بلدي وأكله ونيمه ولا هتفرقي معاه يقولولك لا بيعرفك من ريحتك !حضرتك برده اي ست بتولد بتبقي ريحتها لبن ريحه ايه اللي هيعرفها
-طبعا استعدي لمرحله جديده من حياتك انك بقيتي شفافه غير مرئيه كل اللي حواليكي مش شايفين غير البيبي وكل وظيفتك في الحياه انك تاكلي وتشربي عشان تقومي بوظيفتك الجديده كويس وهي انك تبقي بقره حلوب
هتلاقي لترات حلبه بتتحدف عليكي هتشربي حلبه وتعرقي حلبه برضه فتبقي ريحتك مزيج من الحلبه واللبن فلضمان استمرار حياتك الزوجيه يفضّل جوزك ميشوفكيش اول ٤٠ يوم بعد الولاده، طبعا حلبه بالعسل الأبيض ،حلبه بالعسل الأسود (ماهي حلبه برده مش عارفه ايه الفن في كده) ينسون بالعسل شمر ،كراوية،عين عفريت ،موغات ،فيتامينات،مقويات ....كل اللي يجي علي بالك ورضعي
طبعا مش محتاجه أقولك ان البيبي هيعط بس ده اكتر نشاط هيعمله وإنتي البسي بقه: حرام عليكي اكليه .مانا اكلته .يبقي مشبعش ياضينايا يابني أمك مجوعاك
علي الجانب الاخر بطنه منفوخه إنتي اكلتيه كتير ياضينايا يابني أمك مزغطاك متبقيش عارفه تآكلي الواد ولا تحطي صوباعك في بلوعومه تخلي يرجع ولا تعملي ايه
وخدي من ده كتير بقه :ده بردان لبسيه ،نفس العيل نفس اليوم ده حران قلعيه واخده بالك إنتي هتلاقي كل الكلام بينتهي ييه
اكليه ،كرعيه،لبسيه،قلعيه،حميه ،نيميه،،،طب جربي تشقلبيه
زي ماقولتك إنتي بقيتي شخص مش موجود في الوجود اصعب حاجه ان أصلا الموضوع صعب واللي حواليكي فاكرين انهم بيساعدوا وهما في الحقيقة بيصعبوها عليكي اكتر ده غير ان نفسيتك أصلا هتكون تعبانه واللي يجي يقولك صباح الخير هتعيطي فالموضوع مش ناقص اذا عرفتي تاخدي ابنك وتعدي في اوضه لوحدكوا متشوفيش حد يبقي أحسن لحد ماتعدي اول فتره ....
وأشوفك بقه المره الجايه افطمك علي المرحله اللي بعد كده
أعدي بالعافيه واشربي حلبه
اولا الجواز
بصي ياستي البنت اللي مخطوبه وخائفة من الجواز أحب أقولك ان الجواز قبل الخلفه لعب عيال زمبقولك كده توقعي كده ايه أقصي حاجه هتحصل؟ مش هتعرفي توضبي البيت؟ عنه ماتوضب خليه معفن أقصي حاجه انك هتربي عنكبوت ظريف يسليكي إنتي وجوزك ويملالك الأركان عشان متبقاش فاضيه كده ، او هتحرقي الاكل هتاكلوه برده وهو محروق اعتبريه صنف جديد ،من الاخر الجواز قبل الخلفه دلع
-تعالي بقه للجد حملتي؟ الف مبروك طبعا اول حمل ده ليه مذاق خاص دلع بقه واهتمام من كل اللي حواليكي وكل ما حد يعرف هتسمعي( الف مبروك ياحبيبتي خدي بالك من نفسك اوي وكلي كويس واوعيييييي تقولي لحد) وفي الاخر طبعا بتلاقي كل الناس عارفه وبيشتغلوكي إنتي بس
-الاهتمام حلو مفيش كلام ،جوزك هيقولك لا بلاش طبيخ متتعبيش نفسك، مامتك تعملك اكل وتبعتهولك ،حماتك كل شويه تطمن عليكي وطبعا نصائح عظيمه من كل الناس انك حامل ولازم تآكلي لاتنين وكلي صحي ومفيد اللي هو سمنه بلدي وألبان كامله الدسم في محاوله تحويلك الي جاموسه عشار تجيب عجل كل العيله تفرح بيه
-إحساسك بقه الكيوت اللي هيخليكي تبصي علي بطنك كل دقيقه ومستنياها تكبر والبيبي هيتحرك امتي بقه وأول حركه للبيبي لما تكون بطنك مزار سياحي لأي حد يحط أيده عليها عشان يحس بحركه البيبي الكيوت
-لحد بقه ماتوصلي للشهر السابع ويبدا التقل بس برده مقدور عليه عشان قدامك الفرصة الاخيرة للنوم براحتك من غير منغصات وافتكري أني قولت فرصه اخيره لحد ما يجي وقت الولاده ....تاتاتاتن
-غالبا الدكتور هيقولك ان عندك مشكله للأسف مابتحصلش كتير ولازم تولدي قيصري زي ماقال الكلام ده لكل الستات قبلك ويشق بطنك ويتعلم عليكي زي ماتعلم علي كل ستات الجيل
ويجي البيبي بالسلامه الف مبروك بس متفرحيش اوي ...تهنيات واحتفالات واجواء ظريفه لحد ماتروحي البيت مع هذا الكائن الجديد اللي إنتي مش عرفاه ولا فاهمه فيه حاجه
-بصي بقه اكتر حاجه مزعجه تخاريف اول بيبي كل حاجه ليها اسطوره زي مثلا: حبيبي عارفك !!حضرتك عارفها ازاي عيل عنده يومين مبيشوفش أصلا كل طموحه في الحياه يأكل وينام عرفها امتي ؟! اذا اديتيه لكلب بلدي وأكله ونيمه ولا هتفرقي معاه يقولولك لا بيعرفك من ريحتك !حضرتك برده اي ست بتولد بتبقي ريحتها لبن ريحه ايه اللي هيعرفها
-طبعا استعدي لمرحله جديده من حياتك انك بقيتي شفافه غير مرئيه كل اللي حواليكي مش شايفين غير البيبي وكل وظيفتك في الحياه انك تاكلي وتشربي عشان تقومي بوظيفتك الجديده كويس وهي انك تبقي بقره حلوب
هتلاقي لترات حلبه بتتحدف عليكي هتشربي حلبه وتعرقي حلبه برضه فتبقي ريحتك مزيج من الحلبه واللبن فلضمان استمرار حياتك الزوجيه يفضّل جوزك ميشوفكيش اول ٤٠ يوم بعد الولاده، طبعا حلبه بالعسل الأبيض ،حلبه بالعسل الأسود (ماهي حلبه برده مش عارفه ايه الفن في كده) ينسون بالعسل شمر ،كراوية،عين عفريت ،موغات ،فيتامينات،مقويات ....كل اللي يجي علي بالك ورضعي
طبعا مش محتاجه أقولك ان البيبي هيعط بس ده اكتر نشاط هيعمله وإنتي البسي بقه: حرام عليكي اكليه .مانا اكلته .يبقي مشبعش ياضينايا يابني أمك مجوعاك
علي الجانب الاخر بطنه منفوخه إنتي اكلتيه كتير ياضينايا يابني أمك مزغطاك متبقيش عارفه تآكلي الواد ولا تحطي صوباعك في بلوعومه تخلي يرجع ولا تعملي ايه
وخدي من ده كتير بقه :ده بردان لبسيه ،نفس العيل نفس اليوم ده حران قلعيه واخده بالك إنتي هتلاقي كل الكلام بينتهي ييه
اكليه ،كرعيه،لبسيه،قلعيه،حميه ،نيميه،،،طب جربي تشقلبيه
زي ماقولتك إنتي بقيتي شخص مش موجود في الوجود اصعب حاجه ان أصلا الموضوع صعب واللي حواليكي فاكرين انهم بيساعدوا وهما في الحقيقة بيصعبوها عليكي اكتر ده غير ان نفسيتك أصلا هتكون تعبانه واللي يجي يقولك صباح الخير هتعيطي فالموضوع مش ناقص اذا عرفتي تاخدي ابنك وتعدي في اوضه لوحدكوا متشوفيش حد يبقي أحسن لحد ماتعدي اول فتره ....
وأشوفك بقه المره الجايه افطمك علي المرحله اللي بعد كده
أعدي بالعافيه واشربي حلبه
ليست هناك تعليقات:
إرسال تعليق