طبعا كلكوا شوفتوا الفيديو الشهير بتاع قسم شرطه الكردي اللي فيه ضباط شرطه وجيش ماسكين اتنين مواطنين بيتشطروا عليهم وبيضربوهم علي قفاهم وبيكهربوهم.
الفيديو ده انتشر بسرعه ع المواقع وبعدين في برامج التوك شو وسمعنا (كالعاده)ان هيجري (تحقيق)في الفيديو ده ومحاكمه الضباط ...لحد هنا تمام ..
بليل بقه لما برامج التوك شو نشرت الفيديو وقالت ان جاري التحقيق مع الضباط اللي في الفيديو وعايزين ناخد آراء الناس انت مع او ضد تحويل الضباط دول للمحاكمه.(مع ان ده مش سوال اصلا).
اللي فاجعني بقه حاجتين اولهم :مذيعه انا كنت بحترمها جدا وفي رأيي مثقفه جدا (بدون ذكر اسماء مني الشاذلي)وهي بتقدم الفيديو قالت بكل بساطه :ان الضباط كانوا بيضربوا اتنين شكلهم واضح جدا انهم بلطجيه!..يالا العجب!!..ده اول القصيده
عرفتي منين يامتعلمه يابتاعت المدارس انهم بلطجيه؟؟هو بالشكل؟يعني لو ربنا مرزقش واحد بخلقه تعجب الناس خلاص يبقي ده بلطجي ولازم يتكهرب في القسم؟
وكملت :هما مخدرين واخدين ١٠٠٠٠حبه ترامدول!!!(فتي التنين).
عرفتي منين ياست الداكتوره انهم واخدين مخدر؟حضرتك كشفتي عليهم واتاكدتي؟ولا هو اي تبرير والسلام؟
الاناح من كده راي الناس اللي فجعني بصراحه،لما معظم الناس يكون رأيها :اه يستاهلوا اصل دول بلطجيه ،واحنا بنطالب الجيش والشرطه انها تضرب البلطجيه بيد من حديد ومد فتره الطواري(اكتر ماهي ممدوده)...يابلاد ماليها الا العجب!
يعني إيه إحنا بنشجع الشرطه انها ترجع شغلها ويقولك هي ادري مننا في التعامل مع الناس،يعني إحنا كده كلنا بالصلاه علي النبي بهائم مبنفهمش حاجه والشرطه هي اللي بتعرف تتعامل مع الناس.
ويعني إيه متقدموش الضباط للتحقيق احسن الشرطه مترجعش شغلها؟هو إيه تهديد يالا الشرطه ترجع بالأسلوب التعذيب القديم ياما مش هترجع ؟هو بمزاجهم ؟ده لو كانوا بيشتغلوا ببلاش مكنوش هيعملوا كده ..وكلنا عارفين ان اديلنا ٨شهور بندلع في الشرطه عشان ترجع شغلها وهي تقولنا وانا مالي اهيه!وحوافز إيه وترقيات إيه كل ده من فلوسنا ،يعني بنديهم فلوس عشان يضربونا! لا وكمان بقه بمساعده الجيش كمان يعني الجيش والشرطه ايد واحده بتضرب فينا؟
وبعدين ان عايزه اعرف إحنا عايشين فين بالضبط؟لما يبقي البلطجي يضرب ويتكهرب ويتسحل علي يد ناس حامله للقانون والمفروض انها بتطبقه وان القانون ده بيقول المتهم بري حتي تثبت إدانته يعني الناس اللي بتضرب دي برئيه بحكم القانون،يبقي إيه لازمه القانون ده اصلا لما إحنا مش عايزين نطبقه؟مانلغي بقه القانون ده خالص ونقضيها بلطجه وهمجيه اهو حتي يبقي الموضوع منظم!؟
ولما الناس موافقه قوي علي ان (اللي شكله بلطجي)يتعامل بالهمجيه دي او نفترض انه فعلا بلطجي .يعني سرقله كام الف مثلا؟طب يبقي لازم بقي عز وجمال مبارك وغيرهم يتكهربوا ويضربوا علي قفاهم ..ولا عشان دول شكلهم كويس وبقوصه؟ يعني اللي سرق الف ولا اللي سرق ملايين؟لكن العكس هو اللي حصل عز باشا كان امين الشرطه بيعمله شاي وهو قاعد باشا في القسم!
وكمان لازم ضباط امن الدوله اللي كانوا بيهتكوا عرض الناس يتقبض عليهم ويتعاملوا بنفس الاسلوب اللي كانوا بيعملوه في الناس ،لكن البشوات بيشتغلوا وبيترقوا كمان..
عايزه افهم هي المبادئ بتتجزي؟ لو عايزين تطبقوا قانون الغابه ده يبقي يطبق علي الكل ولا هو اذا سرق الشريف تركناه واذا سرق الفقير اقمنا عليه الحد؟
وان كانت الطواري والمحاكمات العسكريه قادره انها ترجع الأمن كانت رجعته إحنا اديلنا ٨شهور في طواري والأمن لسه مرجعش.
ومن غير مانضحك علي بعض الشرطه لو عايزه تعمل شغلها صح هتعمله وهتعرف ترجع الأمن بس نقول إيه في ناس اخدت علي الانتخه ومبسوطه ان الناس بتتحايل عليهم عشان يرجعوا.
من الاخر بقه علي الاسلوب ده محدش يزعل لما يتقبض عليه ويتسحل في القسم ويضرب ويتكهرب لمجرد ان شكله معجبش البيه الضابط وساعتها محدش هيتعاطف معاه لأننا بنساند اللي شكلهم حلو بس،
الفنان صلاح جاهين قال:
انا كل يوم اسمع فلان عذبوه
معجبش من اللي يطيق في جسمه العذاب
واعجب من اللي يطيق يعذب اخوه...
انا بقه بعجب من اللي بيشوف اخوه بيتعذب ويقول احسن يستاهل،،،،،اصله بلطجي!
ومفيش العواف.
ليست هناك تعليقات:
إرسال تعليق