كشفت راسي ودعيت عليك

بما ان انهارده يوم التدوين ضد انتهاكات العسكر فدي فرصتي أني اجعر وأقول كل اللي في نفسي بس مبدئيا انتوا عارفني انا خالتكوا ام بوحسن انا لا ناشطه ولا خامله ولا مدونه انا مواطنه عاديه من حزب الكنبه بس عايزه اقول كلمتين للعسكر
اولا كان في كام جمله بسمعهم كتير لحد مازهقنا.. زي الجيش خط احمر،لازم نفصل بين الجيش والمجلس العسكري ،المجلس العسكري قابل للنقد(بس اللي هيفتح بقه هيتشد ع السجن الحربي)..كل الكلام ده كنا بنسمعه ع انه مسلمات بس لو فكرنا في كل جمله لوحدها هنلاقي انه كلام ملوش اي تلاتين لازمه:
الجيش خط احمر:يعني إيه؟يعني يعمل اللي هو عايزه ونتكتم ونخرص؟الجمله دي أثرت ع الناس لدرجه ان النشطاء اللي بيتكلموا عن انتهاكات العسكر بيبقوا بلطجيه وصيع.
لازم نفصل بين المجلس والجيش:والله انا فصلت بس لقيت ما اسخم من سيدي الا ستي،يعني المجلس بيصدر قرارات السياسيه الغريبه و الجيش اللي بيضرب الناس وبيكهربهم ..اديني فصلت
المجلس العسكري قابل للنقد:بس في نفس ذات الوقت اي حد حيفتح بقه وينقد المجلس العسكري هيتشد ع النيابه العسكريه ..
كل الجمل دي لازم تتحذف و مفيش خطوط حمرا غير الشعب المصري الجيش والمجلس العسكري والحكومه بيشتغلوا عندنا و خيرنا عليهم ومن حقنا نقول اللي إحنا عايزينه.ونغيرهم كمان لو مش عاجبنا.

نيجي بقه للانتهاكات ..
مش عارفه اقو إيه ولا إيه مع العلم ان اللي اعرفه مش كل حاجه:
*٨٠٠٠شخص مدني يحاكم عسكريا
(وده اكتر من المدنين اللي اتحاكموا محاكم عسكريه خلال فتره مبارك كلها)
*هتك عرض..قصدي كشف عذريه للناشطات
(وده ملوش اي تفسير غير انه هتك عرض مع سبق الإصرار والترصد للناشطات)
*فض اعتصام ٩مارس بالقوه والقبض ع الشباب ومنهم بيواجه محاكمات تصل ل٥سنوات
*فض اعتصام كليه الاعلام بالقوه
*فض اعتصام ٨ ابريل بالقوه (اللي نتج عنه موت شخص واصابه عشرات )
*فض مظاهره سفاره اسراءيل (ماحنا لازم نحمي اسراءيل بحياتنا)
*فض اعتصام التحرير يوم ١رمضان بالقوه
*فض افطار التحرير بالقوه 
واللي ادهي من كده وامر ان المدنين اللي بيتحاكموا محاكمات عسكريه بيتعذبوا في السجن الحربي وبيتكهربوا ( ده وفقا للشهادات اللي نشرها مركز النديم) ،يعني مش كفايه انهم مدنين وبيتحاكموا محاكمه عسكريه (ومبارك ورموز النظام بيتحاكموا مدنيا) لا كمان بيتعذبوا والبعيد كان مشرف في شرم الشيخ

 كل بلوه من البلاوي اللي انا قلتها دي المفروض يتحكي عليها حواديت وميتسكتش عليها بس كل مانتكلم في واقعه من دول بيتقال جاري التحقيق..واللي بيزود في الكلام بيتشد ع النيابه العسكريه.
انا مقولتش موقعه العباسيه لانها كانت مواطنين ضد المتظاهرين والجيش كان بيسخن ..قصدي بيتفرج بس دي ادت لوفاه الشهيد محمد محسن وده برده...جاري التحقيق!

انا بس عايزه افهم حاجه المجلس العسكري والجيش عايزين مننا إيه؟ بجد يعني إيه لازمه اللي بيحصل ده كله؟ وع كل البلاوي دي مفيش اي قرارات عدله بتاخذ غير لما تطلع روحنا ولسانا يدلدل من كتر المطالبه بيها..

واحنا انهارده في ذكري انتصار الجيش في حرب اكتوبر المجيده عايزه اسأل: ازاي الجيش المصري اللي انتصر ع اسراءيل هو نفس الجيش اللي كان بيضرب المتظاهرين عند سفاره اسراءيل ؟؟؟
هو الجيش مش هو الجيش ولا اسراءيل مش هي اسراءيل ؟

وازاي الجيش الوطني العظيم اللي اقتحم خط برليف هو نفس الجيش اللي بيقول للممواطنين المصريين اركع ع ركبك يابن ال......؟؟؟

وبالنسبه للمجلس العسكري:ازاي نفس اللوز اللي طلع اعطي تحيه عسكريه للشهدا هو نفس اللوز اللي طلع يشخط في الشعب ويهدده؟؟؟

هقول إيه غير كشفت راسي ودعيت عليك يا عسكر بكل اشكالك (هتعملي مجلس هتعملي شرطه عسكريه هتلبس جيش ..مش هتفرق)
اتقوا الله فينا وان كنت ناسي افكرك :اللي اخترع فرعون قادر يجيب خبره..

<>ملحوزه>:من هذا المزنق احب اشكر مني سيف هي وكل مجموعه لا للمحاكمات العسكريه ،الناس دي بتتعب جدا عشان تدافع وتنقذ المدنين اللي بيتحاكموا محاكمات عسكريه
أعدوا بالعافيه
خالتكوا ام بوحسن