العواف عليكوا ،خير اللهم اجعله خير قريت انهارده مقال علاء عبد الفتاح عن الدستور وانا رايحه الشغل ومضروبه جزمه بس بصراحه المقال مزجني أنا كام بوحسن اتبسط،هو بيتكلم عن الدستور اولا او البرلمان اولا بس فاول المقال بيقول جزء تاريخي عن جنوب افريقيا وازاي حطوا الدستور بتاعهم
الجزء ده راءع بجد،بطريقه بسيطه الشعب هو اللي وضع الدستور اللي هيحدد هويه الدوله ويورثه الأجيال
إيه ألطريقه؟اسم الله عليهم اذكياء ،متطوعين نزلوا الشوارع جمعوا آراء الشعب ،بتحلم تشوف جنوب افريقيا ازاي؟والمتطوعين دول بيودوا الآراء دي للجان فرعيه اللي بتجمعها وتوديها للجان تاسيسيه تقوم بصياغه الآراء دي في شكل مواد دستوريه
وبعدين الآلاف من الشعب اتجمعوا في ميدان بيصوتوا ع المواد اللي هما حطوها
وهنا بقه أنا كنت منتشيه ومتكيفه ع الاخر وبحلم ان ده يحصل عندنا ،يعني الائتلافات اللي عماله تكتر باسم الثوره لحد ماحاسه انه هيبقي في اءتلاف لكل مواطن ،الناس دي وغيرهم كمان ينزلوا يجمعوا آراء الشعب بتحلم بمصر عامله ازاي؟ومحدش يقولي نخبه تضع الدستور،..سلامات يا نخبه،نخبتنا العظيمه لا تمثل الشعب وشايفين ان الشعب غير واعي وانا من هذا المزنق احب اقول لكل واحد شايف الشعب مش واعي يروح يشوفله شيعب تاني واعي وبرباط من الاخر كده
وبرضه أنا مش موافقه ان البرلمان هو اللي يضع الدستور عشان أنا مش ضامنه ان كل اللي في البرلمان دول هيبقوا بيمثلوا الشعب وبعدين ليه حد يمثل الشعب اصلا ما الشعب نفسه موجود ،الله،،يعني ليه ميبقاش فيه متطوعين يجمعوا آراء الشعب ويودوها للجان فرعيه وعن طريق لجنه تاسيسيه منتخبه يصيغوا آراء الشعب في شكل مواد دستوريه؟ يعني هي جنوب افريقيا أحسن مننا وبعدين كده هيبقي الشعب كله توحد في صياغه دستور هنعيش بيه ونورثه لعيالنا كده ان شاء الله وبعدين نعمل استفتاء ع كل مواد الدستور اللي الشعب حددها ونطلع دستور مصر اللي نقدر نبصم بالعشره انه بيعبر عن اراده الشعب،من غير بقه منغش من الدساتير التانيه عشان نحطلنا دستور ،إحنا معدمناش ونعرف نعمل دستور مختيلف عن كل الدساتير اللي في الدنيا يكون بيعبر عننا إحنا بس وعشان كمان محدش يغشه مننا بعد كده..
بس خلاص دول البوقين اللي عايزه اقولهم
فوتكوا بعافيه بقه ،،خالتكوا ام بوحسن
ليست هناك تعليقات:
إرسال تعليق