ودي خناقتي مع المدير المدير المدييييير ...خناقتي مع المديييييييرررررر
مبدئيا أنا عايزه افش غلي فبفشه في الكتابه اوك انا بنصح اي حد مقبل ع الحياه او ع شغل جديد ميقراش الكلام دهون...
خير اللهم اجعله خير أنا صحيت الصبح الساعه ٦.٣٠بليل كده وكانت هرمونات الشجاعه طافحه عندي فقولت أنا انهارده هتخانق مع (المدير )..قعدوا يقولولي لا اتكلمي براحه عشان تعرفي تأخذي حقك وقعدوا يقنعوني :براحه يام بوحسن ،اكل العيش صعب يام بوحسن .قلت حاضر بيراحه خالص
رحت بقه وانا كنت نائمه في الطريق ومدروخه..اول ماوصلت قالي خدي الفايل ده اعمليله شوب دروينج (اللي ميعرف ده يعني اعمله تفاصيل وكده وهي اصلا شغلت رسام مش شغلتي خالص)المهم ده كات القشه اللي كسرت ظهر البهيمه..قلتله بكل جراه :يا بشمهندس إحنا مش متفقين أني مش هعمل شوب دروينج تاني...وهي الجمله دهين ولقيت بلاعهزعيق طفحت في وشي:يعني أنا اعمل إيه ماهو شغل هو أنا بشحت منك اكنك يعني بتشتغليلي أنا مبيدخلش في جيبي حاجه...وانا بسمع الكلام ده واكشششش واضمحل في قلب الكرسي ،قلتله طب أنا ذنبي إيه مانا اديلي ٦شهور بشتغل شغل مش شغلي ولا ليا فيه،وانا درست ٥سنين وطلعت عيني مش عشان اشتغل حاجه مش شغلتي
(اللي أنا بتكلم معاه ده اصلا مش صاحب الشغل هو بس مدير القسم ،واحنا تلاته بس في القسم بيه)المهم اقعد يزعق كمان شويه كده وانا ساكته..راح قالي أسف أني اتعصبت..قلتله حصل خير(بس طبعا من تحت الضرس،ده من تحت السرير كمان)المهم سكتنا ع كده
شويه وجالي قالي اعملي ده كمان..(برضك ارف شوب دروينج) فانا بسال سوال بريء إيه المطلوب بالضبط راح قالي:أنا أعملك إيه يعني؟ انتي بتشتغلي من غير نفس،أنا لو أديت نفس الشغل ده ل(المهندس التاني اللي معانا)هيعمله من غير ما يسألني لكن انتي كل شويه دي فيها إيه (وقعد يقلدني كده بس الصراحه قدراته التمثيليه كويسه يجي منه)وانا لو بكتب تقارير اقول كل واحد بيشتغل إد إيه كنت هقول انك بتشتغلي من غير نفس(لولا انه سوري كت قلت ده امن دوله وفلول وحزب واطي منحل)
قلتله يعني أنا كمان اللي غلطانه أنا اللي بشتغل اديلي ست شهور ومش بعمل شغلي والمفروض اشتغل بنفس؟(ده حتي تبقي نفسي معفنه قوي)رد بقه رد مفاجع..ان ان اااااان قالي:انتي مش بتشتغلي ببلاش يام بوحسن..أنا إلكلمه عورتني شويه، يعني اولا أنا مش بشحت منك يعني أنا اديلي ٦شهور مش بفتح بوقي المهم قلتله:أنا مش بشتغل عشان الفلوس أنا عايزه أتعلم أنا لسه متخرجه السنه اللي فاتت وعايزه أتعلم حاجات في اختصاصي (طبعا كأني بكاكي)قالي حاجه عجيبه كده ان الدلعدي صاحبه قعد يشتغل ٣سنيين بيصمم حمامات ومطابخ بس! أنا مش عارفه ساعتها احوش الدمعه اللي كات هتفر من عيني ولا احوش الجزمه اللي كت عايزه ارميها في وشه)قالي ومكنش بيتكلم كان مضايق بس مكانش بيتكلم...
المهم أنا سكت ع كده راح جيه أداني شغل تاني (برضه زفت)وقالي خلصيه دلوقتي،
يعني كأني كنت بهوهو مثلا وساعتها عرفت ان مفيش فايده
طبعا في ناس هتقولي طب إيه اللي مقعدك ماتسيبي الشغل:أنا قاعده ع امل ان أعمل شغلي في المستقبل القريب وكنت واخده وعد من صاحب الشركت أني مش هشتغل شوب دروينج تاني وهتفرغ للتصميم..بس طبعا رءيس القسم اثبتلي ان ده لما أموت واخش الجنه
المهم ان أنا كت حاسه بالغضب وعايزه اضربه وافطسه واكسرله ام الكمبيوتر وهو بيرندر( اهو كده تبقي الجريمه كامله) بس أنا مرضشت عشان ده برضك زي مديري والجيريمه لا تفيد
انا كل اللي عايزاه أني اشتغل وظيفتي اللي درست عشان اشتغلها كتير عليا؟
هيييييييييه..أنا من هذا المزنق احب أقول لكل شاب وكل فتاء لو المدير هزقك اسكت ومتردش وبوس ايدك شعر ودقن والبطاله لا تفيد ..واول ماتلاقي شغل تاني روح توف ع وشه
بس بقه هي دي قصه حياتي..اسفه ع القصه اللي ملهاش اي تلاتين لازمه دهين والرغي ده كله بس كان لازم اجعجع بدل مااكتم في نفسي وافطس وأموت وبوحسن يتيتم
يلا أعدوا بالعافيه..خالتكوا ام بوحسن
ليست هناك تعليقات:
إرسال تعليق