عرييييس ياباي..طخه بس متموتوش يابوي

عريييس ياباااي..طخه بس متموتوش يابوي
اول عريس رسمي في حياتي
خير اللهم اجعله خير جالي عريس، مشفنيش الاول طبعاً جه كده ع السمع ،المهم هو اسم النبي حارسه مهاندس إد الدنيا وسنه مناسب وقشطه
طيب حددنا معاد بره عشان المقابله الاولي وكدهون ،لبست وعملت اراجوز في وشي وضربت الحته اللي ع الحبل ونزلت انا وامي،، واول ماوصلنا..حسيت ان قلبي بيدددددق ومسكت في ديل امي بجد وكنت مستخبيه وراها ،.كنت حاسه أني عروسه حلاوه وواحد جاي يتفرج علي بس يلا كله يهون عشان ابو بوحسن(ده اسم العريس الحركي)
قعدنا وانا كنت باصه في الارض وبمااني معنديش خبره استعنت بصديق! اختي حبيبتي عشره برضك وتفهم عني كل ما يقول حاجه ابعتلها رساله اقولها حصل كذا واحنا قاعدين 
الاقعده تلخصت انه قعد يتكلم مع ماما وبعدين بلاعه سياسه طفحت ع الاعده (وآراءه السياسيه غير آرائي خالص)بس ماعلينا شويه وقومنا 
اتصل تاني يوم ها..ايه الاخبار ينفع نعد قاعده تانيه عشان انا والانسه ام بوحسن ملحقناش نتكلم؟امي قالتله اوك (عايزه تسترنا برضك) وفي المكالمه قعدت تسأله ع شويه حاجات واجاباته فاءجتني الصراحه :
مثلا انت بتحب ايه في الست اللي هتتجوزها؟قالها انا عايز ست تدي تدي ومتقولش هات،، يعني متقوليش اشمعنه انا بعملك وانت مبتعمليش..امي قالتله وانت هتديها ايه؟قالها انا مش مطلوب مني ادي لان الست المفروض تكون سكن للراجل مش هو يكون سكن ليها،،انا المفروض احققلها الأمان!!
انا استنتجت انه خلاص انا وابو بوحسن اتفقنا..انا علي السكن وهو عليه الأمان.. 
وقعدت افكر هو انا سكن كام متر؟ بيتهيقلي ادتين وعفشه ميه كويس بالنسبه لبدايه حياه الست.. كمان شويه هحس أني ضيقت عليه هاضطر ابقه ميه متر( من غير البلكونات والمناور)
المهم جات المقابله التانيه بس الصراحه انا كام بوحسن اتبسط.. قعدنا وفاجه لقيته تقريبا بيسبلي ،،وقالي ايه بقه؟ ،،قلتله ايه؟ قالي عامله ايه في الشغل قلت الحمد لله بتخانق(انا كنت لسه دبه خناقه في الشغل) لقيت درر بتطلع من بقه: 
اصلا البنات فاشلين في الشغل ،٧٠%مبيعرفوش يشتغلوا وبيدلعوا انا لما بيكون معايا بنت في الشغل بعاملها باحتقار! 
قلتله يعني انت ضد شغل الست؟قالي ان كان ليأثر ع بيتها يبقي بيتها اهم بلا بللا بلا 
راح داخل في حوار الست سكن تاني(وانا نسيت أسأله عايزني كام اوده عشان اجهز نفسي) يعني المفروض متفكرش في نفسها خالص ميهمهاش غير جوزها لكن هو مش مطلوب منه كده الراجل عادي انه يفكر في نفسه اكتر (انا كل ده بسمع وانا رافعه حاجب ومنزله حاجب وفاتحه بوقي) وانا الصراحه شوفت ستات عجب يعني واحد صاحبي مراته كانت فظيعه (انا قولت الوليه بتآكل دراع جوزها ولا حاجه) بتتصل بيه في الشغل تكلمه وهو كان لسه معاها الصبح(شوفوا ازاي؟  نسوان عايزه الحرق) انا استجرات وسالت ايه المشكله؟ قالي ازاي مش مقدره انه في شغله ازاي بتعطله ويعني ايه واحشها دي ماهو كان لسه معاها؟ امي استجرات هي كمان وقالته ماهي قاعده زهقانه.. قالها انا لو حد عمل معايا كده هتخانق معاه وأكسر التليفون ازاي مش سايباه يركز في شغله؟ 
قلت مش مشكله يام بوحسن انا هبقي ستمن بوكمن خالص ولا هتصل ولا هجيب تليفون حتي مش مشكله..كمل يابو بوحسن.. اشجيني :قالي الست هي اهم حاجه في البيت هي اللي المفروض تعمل كل حاجه الراجل مبيعملش حاجه زي( شوفوا التشبيه)الفورمان ليشتغل اكتر من المهندس المهندس مبيعملش حاجه! 
انا قلتله ياحوستي انت بتشبه الست بالفورمان؟ قالي ع فكره المهندس ممكن يتعلم من الفورمان(ده تشبيه بليغ يعاقب عليه القانون) ماعلينا كمل يابو بوحسن قالي يعني تدي ومتقولش اشمعنه انا بديك وانت مبتديش لا متقولش كده.. قلتله آمال؟ هي تقوله كلام حلو مثلا وهو ميقولهاش؟.. قالي اه وع فكره مش لازم يقولها كلام حلو عشان تعرف انه بيحبها ممكن تعرف بالمواقف يعني مثلا لو اتكعبلت لو بحبها مش هروح اقومها؟ قولتله ولو مش بتحبها هتسيبها تولع يعني ؟ قالي لا بس اللهفه هي اللي هتدل ع الحب ، قولتله يعني انا لما اكون عايزه اعرف بتحبني ولا لا لازم أتكفي ع وشي؟ ويا لهفتني يا ملهفتنيش؟قالي مانتي هتدي واجرك عند ربنا المفروض متطلبيش... قولتله هو انا متجوزه من الهلال لأحمر؟ طب مروح أتبرع بكوليه وادي حاجه بدل مادي طول العمر؟! 
قعد ابو بوحسن يديني شويه درر كده (بس الحق يعني هو طيب قوي قوووي) راحت امي فاض بيها الصراحه قالتله يابني مينفعش كده مفيش حد بيعد مع عروسه بيقولها الكلام ده ( وانا موافقاها الصراحه) هو قالها عندك حق وبصلي قالي طب اسالي انتي انا اتكلمت كتير( قعدت افتكر الاسءله اللي اختي كات ممليهالي) اه افتكرت هو انت قولت انا السكن وانت الأمان أمان ازاي يعني ؟ راح ضحك وقالي بعدين هتعرفي (انا اعتقدت انها حاجه قليله الادب وهو كده بيجرني للرذيله وانا الصراحه بحبها) قالي اصل الأمان ده يتحس مش يتقال( كلامك حيكم يابو بوحسن)
الساعه جات ١٢ وانا عندي سفر الصبح عايزين نقفل ام الاعده قفلناها باعجوبه وجيه الحساب: امي قالتله: متخليها علي المره دي
قالها: مبعرفش( مش عارفه ميعرفش ايه بالضبط) انا معرفش تكون واحده قاعده معايا واخليها تدفع ( الواحده دي هي امي للاسف) وع فكره انا مش بمثل انا بجد مش بمثل انا والله مابمثل( ماما قالتله صادق يابني )بس دي طبيعتي...
انا مشيت بضرب كف ع كف ، مش فاهمه هو كان جاي يطفش امي ولا يعكنن علي؟... بس قولت اهه.. يبقي حد كسر النحس وانا اللي مليش في الطيب نصيب... 
هيييييييه(بتنهد يعني) دنيا ربنا يكرم بقه والأقي اب لبوحسن بسرعه عشان الاعده دهين مش ولابد،لازمن الواحده يكول لها دكر تسند عليه ويكون أمان ليها..ايه ده  ؟ أمان؟ لهو ده الأمان؟ اهههههههههه طب مقلش ليه؟ايه ياختي الراجاله المستحيه دهيه؟
يلا فوتكوا بعافيه...خالتكوا ام بوحسن
يلا فوتكوا بعافيه ..خالتكوا ام بوحسن