طه بسم الله كده نبدا قصه انهارده نقول طور يقولوا احلبوه ...(الكلام للمجلس العسكري) يا سياده المجلس والله ماهينفع كده ..كتير بجد الرصيد خولوص وعايز تجيبلك خط جديد يعني ينفع تسهينا وتقر قانون تجريم الاحتجاجات؟ ينفع كده لا ميغركش اننا اسهينا شويه في موضوع مبارك ده لالالا كده غلط ده احنا صاحيين ونعجيبك قوي
يعني احنا كنا عمالين نكاكي ايام مبارك بإلغاء قانون الطواري وبعد الثوره قلنا مفيش طواري تاني ولحد دلوقتي مترفعش القانون المهبب ده تقوم سيادتك بدل ما تشيل قانون الطواري تحطلنا واحد زياده (نقول طور يقولوا احلبوه)
يعني ايه قانون تجريم الاحتجاجات يعني احط دزمه في بقي واتكتم ليه ؟
لا ومش كده وبس ده اللي هيفكر او يحرض ع المظاهره كمان عليه غرامه حتي لو فشل!!(وده بقه انتوا بتعذبوه عشان حرض ع المظاهره ولا عشان فشل؟)
ده مبارك اللي اسمه مبارك (اللي تحول اسمه حاليا لشتيمه )معملش كده تقوم تيجي منك يا مجلس لا أخص عليك أخص
وبعدين يا مجلس متاخذنيش في دي إلكلمه يعني بس انت اديلك فتره كده بتعمل حاجات مش ولابد الصراحه يعني عندك موضوع فض اعتصام كليه الاعلام وكشف العذريه واعتصام ٩ مارس ولا يوم ٨ ابريل لا وختمتها بقانون ابصر ايه منع الاحتجاجات ده
متزعلش مني أنا صريحه أنا بكلمك زي اخويا الكبير (مش زي اب عشان البعيد كرهني في ابويا أنا سخصيا) بس مفهاش حاجه لما تسمع كلام ست كبيره زيي:
بدل القانون اللي بيخرص الناس دهون شوف الناس دي بتتظاهر ليه اعمل جدول لكل فءه من الفئات تسمع مشاكلهم وأديهم جدول زمني بتحقيق المطالب دي ولو الناس دي اتظاهروا بعد كده يبقي بحق اصل الناس مش غاويه إضرابات ومظاهرات اسألني أنا دي ٢٥يناير دي معجزه وكرم من عند ربنا
ومادام انت شاطر قوي في حط القوانين ماتشوفلنا قانون لتجريم الفتنه الطاءفيه كده ع زوقك (اصل الناس دي تعبوني الصراحه) وبرضك قره في الخباثه كده واحنا مش واخدين بالنا ..
اه وبالمره كده عايزين عدد ١ قانون لمنع محاكمه المدنين عسكريا .
ونصيحه تانيه يادي المجلس شيل القانون ده بقه عشان الناس مستهفءاه الصراحه وبيتظاهروا برضك،، اطلع كده قولنا أنا لغيت قانون تجريم التظاهر اللي أنا اقريته من وراكوا واحنا هنسقف برضك وننزل التحرير مخصوص نقول الجيش والشيعب ايد واحده ونعمل معاك الصح
أنا قلت اللي عندي يا مجلس وعقلك في راسك تعرف خلاصك ولازم تلحق تشحن عشان الشعب مبقاش فاتح فتره السماح ع البحري زي الاول
اوعد بالعافية
من طرف خالتك ام بحسن
ليست هناك تعليقات:
إرسال تعليق